Farg‘ona tumani Madaniyat uyida tergov sudьyasi Xislatjon Kukonboev rahbarligida ma‘muriy huquqbuzarlik va jinoyatchilikning oldini olishga bag‘ishlangan sayyor sud majlisi bo‘lib o‘tdi. Tadbir davomida, xususan, yoshlar o‘rtasida sodir etilgan ma‘muriy ishlar ko‘rib chiqildi hamda ularning huquqiy oqibatlari muhokama qilindi. Majlis ishtirokchilari jinoyat va huquqbuzarliklarning oldini olishda oilaning tutgan o‘rni, yoshlar bilan ishlashda profilaktik choralarni kuchaytirish, shuningdek, voyaga etmaganlar bilan ishlash tizimini yanada takomillashtirish zarurligi haqida fikr bildirdilar. Sayyor sud majlisi huquqiy targ‘ibot ishlarining amaliy qismi sifatida o‘tkazilib, aholining huquqiy ongi va madaniyatini oshirish, yoshlar o‘rtasida huquqbuzarliklarning oldini olish hamda huquqiy tarbiyani kuchaytirishga xizmat qilmoqda.