Farg‘ona tumani hokimligida yoshlarning bandligini ta‘minlash, ularni ijtimoiy hayotga faol jalb etish, zamonaviy kasblarga yo‘naltirish maqsadida «Hokim va yoshlar» uchrashuvi tashkil etildi. Tadbirda Farg‘ona tumani hokimi Xamidullo Inomov, tuman hokimi o‘rinbosarlari, Yoshlar ishlari bo‘limi rahbarlari, tegishli mutasaddi tashkilotlar vakillari, yoshlar etakchilari, shuningdek, tumandagi bitiruvchi va ishsiz yoshlar ishtirok etdilar. Uchrashuv davomida hududdagi ishsiz va ijtimoiy himoyaga muhtoj yoshlarni kasb-hunarga o‘rgatish, ularni doimiy ish o‘rinlari bilan ta‘minlash va ijtimoiy qo‘llab-quvvatlash bo‘yicha amalga oshirilayotgan ishlar tahlil qilindi, keng ko‘lamli rejalar muhokama etildi. Shuningdek, yoshlarning shaxsiy qiziqishlari, salohiyati va zamonaviy mehnat bozoridagi ehtiyojlar hisobga olingan holda, ularni IT texnologiyalari, xizmat ko‘rsatish sohasi, sanoat yo‘nalishlari hamda tadbirkorlik faoliyatiga jalb etish masalalariga alohida e‘tibor qaratildi. Uchrashuv davomida ishtirokchi yoshlar tomonidan ishga joylashish, imtiyozli kredit olish, kasb-hunarga o‘qish, dehqonchilik bilan shug‘ullanish uchun er ajratish kabi dolzarb murojaatlar bildirildi. Har bir murojaat tuman hokimi tomonidan diqqat bilan tinglanib, ularni qonunchilik doirasida hal etish va ijrosini muddatida ta‘minlash yuzasidan mas‘ullarga aniq topshiriqlar va ko‘rsatmalar berildi. Mazkur uchrashuv yoshlar bilan ochiq va samarali muloqotni yo‘lga qo‘yish, ularning hayotga faol integrasiyasini ta‘minlash va kelajakka ishonchini mustahkamlash yo‘lida muhim platforma sifatida xizmat qildi.