2025-yil 20-may kuni erta tongda Farg‘ona viloyat prokuraturasi hamda viloyat Ekologiya, atrof-muhitni muhofaza qilish va iqlim o‘zgarishi boshqarmasining Farg‘ona tuman bo‘limi davlat inspektorlari tomonidan navbatdagi ekologik nazorat reyd tadbirlari o‘tkazildi. Reyd davomida “Yordon” mahalla fuqarolar yig‘ini hududidan oqib o‘tuvchi soyga fuqaro K.A. tomonidan suyuq maishiy chiqindilar noqonuniy ravishda oqizilayotgani aniqlanib, ushbu holat joyida zudlik bilan davlat ekologiya inspektorlari tomonidan to‘xtatildi. Holat yuzasidan huquqbuzar shaxsga nisbatan O‘zbekiston Respublikasi Ma‘muriy javobgarlik to‘g‘risidagi kodeksining 72-moddasi 1-qismiga muvofiq ma‘muriy bayonnoma rasmiylashtirildi hamda unga bazaviy hisoblash miqdorining uch baravari, ya‘ni 1 million 875 ming so‘m miqdorida jarima qo‘llanildi. Eslatib o‘tamiz, ochiq suv havzalarini ifloslantirish ekologik muvozanatga jiddiy zarar etkazish bilan birga, aholi salomatligiga ham tahdid tug‘diradi. Shuning uchun bu kabi qonunbuzarliklarning oldini olish maqsadida nazorat tadbirlari muntazam ravishda tashkil etilib, ekologik xavfsizlik ustuvor masala sifatida ko‘rib chiqilmoqda. Farg‘ona tumanida atrof-muhitni muhofaza qilish, suv resurslaridan oqilona foydalanish va ekologik qonunchilik talablariga rioya etilishini ta‘minlash bo‘yicha ishlar izchil davom ettirilmoqda.